Kanisa la Kristo (kwa Kiingereza: Christ Church Cathedral) ni kanisa la Anglikana mjini Zanzibar lililo kati ya vivutio vya kihistoria vya mji huu.
Umbo lake linaunganisha tabia za ubunifu wa Kizungu hasa mtindo wa Kigothi na ubunifu wa Kiislamu hasa katika mapambo na umbo la madirisha. Waanglikana walipenda kuunganisha mbinu hizo katika makanisa waliyojenga katika mazingira ya Kiislamu.
Ujenzi uliongozwa na askofu Edward Steere aliyechagua mahali pa soko la watumwa lililofungwa mwaka 1873. Mwaka ule Sultani wa Zanzibar alipaswa kuitikia matishio ya serikali ya Uingereza kuachana na biashara ya watumwa katika himaya yake. Eneo la soko lilinunuliwa na Mwingereza na kutolewa kama zawadi kwa Steere aliyeanzisha hapa sherehe za ibada, kwanza katika kibanda cha muda lakini kwenye siku ya Krismasi 1873 aliweka jiwe la msingi wa kanisa.
Steere alitumia mahali pa soko hili kwa jengo jipya kama ishara ya wakati mpya. Alijaribu kuonyesha Ukristo kama dini ya uhuru na kulenga hasa kupokea watumwa katika Ukristo. Altari ilijengwa kwenye mahali ilipowahi kusimama nguzo ya kuwafunga watumwa wakati wa kuwapiga viboko. Msalaba ndani ya kanisa ulichongwa kwa ubao wa mti kutoka kijiji cha Chitambo nchini Zambia, mahali ambako David Livingstone aliwahi kuaga dunia.
Ujenzi uliendelea hadi mwaka 1879 ambako kanisa jipya lilizinduliwa rasmi kwenye sikukuu ya Krismasi.
Askofu Steere alizikwa katika kanisa baada ya kifo chake kwenye mwaka 1882.
Sasa ni kanisa kuu la dayosisi ya Zanzibar ya Kanisa la Kianglikana.
